Mas halangkaw an aktibidad kan Bulkan Mayon mantang mas naglaba an pagbulos kan lava hale sa bunganga kaini sa nakalihis na 24 oras. Sa ipinaluwas na Mayon Volcano Bulletin kan Phivolcs ngunyan na Hulyo 1, 2023, naging maluya an pagbulos kan lava sa bulkan na may laba na 2.23 kilometro sa Mi-isi Gully asin 1.3 kilometro sa Bonga Gully.
Uminabot naman an mga pag collapse kan lava nin sagkod sa 3.3 kilometro asin 4 kilometro sa Basud gully hale sa crater. Nairehistro man sa bulkan an 65 volcanic earthquake asin 254 rockfall events siring man an 17 na dome collapse pyroclastic density current events.
Mantang uminabot sa 1,002 tonelada an asupre an ibinuga kan bulkan mantang padagos an deformation kaini. Nasa may 2,000 metrong taas naman kan plume an ibinuga kan bulkan na napadpad sa east-northeast asin general west direction.
Sa ngunyan, padagos na ipinagbabawal kan Phivolcs an paglaog sa 6-kilometer permanent danger zone mantang ipag preparar an mga nasa 7 sagkod 8-kilometro na mga residentes. Mantenido man na nakataas an Alert Level 3 status sa Bulkan Mayon.
//JMB via Phivolcs | Photo Courtesy of Abion #MayonWatch #DZGBNewsOnline
