NAKATAAS man gilayon sa Alert Level 3 an estado kan Bulkang Mayon kasunod kan padagos na pag aborido kaini. Sa datos na ipinaluwas kan Philippine Institute of Volcanology and Seismology o PHIVOLCS ngunyan na aldaw nin Domingo, Hulyo 2, 2023, uminabot sa 397 an rockfall events asin 4 an volcanic earthquake an nairehistrong aktibidad sa Bulkan Mayon.
Uminabot naman sa 864 na tonelada kan sulfur dioxide an naibuga kan bulkan sa nakalihis na 24 oras. Nairecord man an 1,500 metrong taas kan plume mantang padagos an ground deformation. Maluyang pagbulos kan lava hale sa crater na may labang 2.7km sa Mi-isi Gully asin 1.3km sa Bonga Gully asin pag collapse kan lava nin sagkod sa 3.3km, asin 4km sa Basud Gully.
Dai pa pighahali kan ahensiya an posibilidad na magkaigwa nin hazardous eruption sa oras na magkusog pa an pag aborido kaini. Mahigot man na pigbabantayan kan PHIVOLCS an bagong lava dome sa bunganga kan bulkan sa ibong kan maluyang pagbulos kan lava hale sa crater kaini.
Katakod kaini, padagos an pagirumdom kan PHIVOLCS sa publiko na mahigot na ipinagbabawal an paglaog sa 6-kilometer permanent danger zone mantang an mga nasa 7–8-kilometer extended danger zone manteniron an pagiging handa asin pagsunod sa mga otoridad.
//JMB via https://phivolcs.dost.gov.ph/…/18621-mayon-volcano | Tune in to DZGB-am for more updates #MayonWatch #DZGBNewsOnline
